¶ Of Seynt Peter That Cryed Cause Bobe. LXXVI
¶ I fynde wrytten amonge olde gestes,121 howe God mayde Saynt Peter porter of heuen, and that God of hys goodnes, sone after his passyon, suffered many men to come to the kyngdome of Heuen with small deseruynge; at whiche tyme there was in heuen a great company of Welchemen, whyche with their crakynge and babelynge troubled all the other. Wherfore God sayde to saynte Peter, that he was wery of them, and that he wolde fayne haue them out of heuen. To whome saynte Peter sayd: Good Lorde, I warrente you, that shal be done. Wherfore saynt Peter wente out of heuen gates and cryed wyth a loud voyce Cause bobe, that is as moche to saye as rosted chese, whiche thynge the Welchemen herynge, ranne out of Heuen a great pace. And when Saynt Peter sawe them all out, he sodenly wente into Heuen, and locked the dore, and so sparred all the Welchemen out.
By this ye may se, that it is no wysdome for a man to loue or to set his mynde to moche vpon any delycate or worldely pleasure, wherby he shall lose the celestyall and eternall ioye.