¶ Of the Chesshire Man Called Eulyn. Xciiii
¶ Ther dwelled a man in Chesshyre called Eulyn, whiche vsed to go to the towne many tymes; and there he wolde sytte drynkyng tyl xii of the clocke at nyghte, and than go home. So on a tyme he caryed a lyttell boye his sonne on his shulder with him, and whan the chylde fell a slepe about ix of the clocke, the ale wyfe brought him to bed with her chyldren. At mydnyghte Eulyn wente home, and thought no more of his chylde. As sone as he came home, his wyfe asked for her chyld. Whan she spake of the chylde, he loked on his shulder; and whan he sawe he was not ther, he said he wist nat where he was. Out vpon the, horson (quod she), thou hast let mi child fal in to the water (for he passed ouer the water of Dee at a brige). Thou list,278 hore (quod he): for if he had fallen into the water, I shuld haue hard him plump.