¶ Of Hym That Shulde Haue Ben Hanged for His Scoffynge. Lxxxiiii
¶ There was a mery felowe in hygh Almayn, the whiche, with his scoffynge and iestynge, had so moche displeased a great lorde of the countreye, that he thretned to hange hym, if euer he coude take hym in his countrey. Nat longe after, this lordes seruauntes toke hym, and hanged he shulde be. Whanne he sawe there was no remedy but that he shulde dye, he sayde: my lorde, I muste nedes suffre dethe, whiche I knowe I haue wel deserued. But yet I beseke you graunte me one peticion for my soule[s] helthe. The lorde, at the instaunce of the people that stode aboute, so it dydde not concerne his lyfe, was contente to graunte it hym. Than the felowe sayde: I desyre you, my lorde, that after I am hanged, to come iii mornynges, fresshe and fastynge, and kysse me on the bare ****. Where vnto the lorde answered: the deuyll kysse thyne ****: and so let hym go.