Paghahandog Nang Tumagalog
Sa Maloualhating Arcángel S. Rafael
Sa Pagbibigay Puri at Pagganting Loob Sa Caniya
Pintacasi naming hayag ang alindog
icatlong Principe sa Reino nang Dios;
sa mang̃a demonio,y, caquilaquilabot,
daig pa ang lalong marahas na culog.
Sa carunung̃an ca,y talang maliuanag,
sa capangyarihan ay sacdal nang taas,
at sa caauaa,y, ualang itutumbas
sa lahat nang tauo,y, pinalalaganap.
Isa ca sa pitong laguing nagbabantay
sa daquilang trono na cagalang galang
niong Pang̃inoong pinang̃ing̃inigan
nang lupa at lang̃it at boong quinapal.
Haliguing matibay na hindi magahis
niong mang̃a diuang sacdal nang lulupit,
at mabisang lunas sa dalita,t, saquit
nang sinomang tauong napatatangquilic.
Iyong sinusugpa,t, hindi paguitauin
ang capalaloan nang lilong Lucifer
sampong tanang campon na mang̃a souail
dinuduahagui mo,t, laguing sinusupil.
Bunying catiuala nang Ualang capantay
at sugo sa madla,t, malalaquing bagay,
Icao ang ligaya,t, tang̃ing caaliuan
nang nang̃alulugmoc sa capighatian.
Daraquila ca ng̃a,t, di icatlo lamang
nang hari sa lupa na may cahanganan,
cundi nang sa lang̃it na Ualang capantay
at di matapos magpacailan man.
Yaong libolibong mang̃a Espíritus
sa camahalan mo ay nagsisisunod,
palibhasa icao siyang ihinulos
catiuala niyong Amang mapagcupcop.
At sa tumatang̃is na sangcatauohan
habang na sa lupa,t, nang̃ing̃ibang bayan
icao ang pang-ampat sa luhang nunucal
na pinadadaloy nang capighatian.
Icao ang sumama sa batang cay Tobias,
sa madlang pang̃anib iyong iniligtas,
gayon din sa iba na nang̃aglalacad,
bagama,t, di namin napagtatalastas.
Sa alin mang saquit nang nagdaralita
sa banig nang dusa,y, lunas cang mabisa,
lubhang mahalagang handog na biyaya
nang Lang̃it sa tauong ibig matimauà.
Mang̃a nagnanasà na tumangap naman
niong matrimonio sacramentong mahal,
sa inyong saclolo,y, dapat na magsacdal
sa magandang palad nang houag masinsay.
Mang̃a bagong casal naman ay gayon din,
ay nararapat ca nilang pintuhoin,
nang sila,y, maligtas, at houag masupil
nang lilong demonio Asmodeong tacsil.
Ang mang̃a magulang na ang mang̃a anac
ay nang̃auaualay, dapat na tumauag
sa camahalan mo, at nang mang̃aligtas
sa madlang pang̃anib na tulad cay Tobías.
Sa catagang uica,y, ang ibig magcamit
nang tunay na toua,y, sa iyo,y, manalig,
mahal na Arcángel, na halal nang Lang̃it,
magtangol sa tauo sa bayan nang hapis.
¡Oh mapagcandili,t, maamong Arcángel!
na taga pagampon sa madlang hilahil,
alio sa pighati,t, paraluman mandin
sa pacay nang nasang bayang Jerusalem.
Jerusalem bagang caloualhatiang
tinutung̃o namin habang nabubuhay,
caming iyong lingcod doo,y, ipatnubay
sa touid na landas nang houag masinsay.
Linalacbay nami,y, malauac na mundo
na punô nang silo nang lilong demonio,
¿ito,y, dili caya icababalino
nang puso mong handang laguing sumaclolo?
Diyan sa ligaya na hindi masaysay
nang bait nang lalong capahampahaman
at na sa piling ca niyong carurucan
nang Dios na ualang hangang cataasan.
Ipamaguitan mo aco,t, nang maligtas
sa di magpatantang tucso ni Satanás,
na nang̃ingimbulo,t, ibig mapahamac
maramay sa caniya ang sangmaliuanag.
Sa di nasayaran nang sa salang dung̃is
na Virgeng binucalan nang gracia at diquit,
ay idalang̃in mo caming humihibic
sa guitnâ nang ualang ulat na pang̃anib.
Yayamang sa caniyang mapalad na camay
lahat nang biyayà ay pinararaan
nang lumic-hâ nitong boong sangtinacpan,
ani San Bernardong lingcod niyang hirang.
Cami tulung̃an mo, daquilang Arcángel,
na magpasalamat sa maginang Virgen
sa di tumitila,t, auang sapinsapin
bagama,t, cuhila,t, sucab na alipin.
Joaquin Tuason.
Pasig, arao ni San Rafael Arcángel, icadalauang puo,t, siam nang Setiembre nang taong isang libo ualong daan pitong può at ualo.