II Old High-German
Muspilli
... sîn ta piqueme,
Das er towian scal,
Wanta sâr so sih dui sêla
In dem sind arhevit,
Ente si den lîhhamun
Likkan lâzzit;
So quimith ein heri
Fona himilzungalon;
Daz andar fona pehhe:
Dar pâgant siu umpi.
Sorgên mac diu sêla,
Unzi diu suona argêt,
Za wideremo herie,
Si gihalot werde.
Wanta ipu sia daz Satanazsses
Kisindi giwinnit,
Das leitet sia sâr
Dar iru leid wirdit,
In fiur enti in finstri,
Dazu ist reht virinlih ding.
Upi sia avar kihalont die,
Die dar fona himile quemant,
Enti si dero engilo eigan wirdit,
Die pringant sia sâr ûf in himilo rîhhi,
Darî est lîp âno tôd, lioht âno finstri,
Selida âno sorgun; dar nist neoman suih.
Denne der mar in pardîsu
Pû kiwinnit,
Hûs in himile,
Dar quimit imu hilfa kinuok
Pidiu ist durft mihhil allero manno welilihemo
Daz in es sîn muot kispane,
Daz er kotes willun
Kerno tuo,
Ente hella fuir
Harto wîsê,
Pehhes pina,
Dar piutit den Satanaz altist
Heizzan lauc. So mac huckan za diu,
Sorgên drâto
Der sih suntigen weiz.
Wê demo in vinstrî scal
Sîno virina stuen,
Prinnan in pehhe;
Daz ist rehto palwig ding—
Daz man den harêt ze gote,
Ente imo helfa ni quimit;
Wânit sih kinâda
Diu wênaga sêla
Ni ist in kihuctin
Himiliskin gote,
Wanta hiar in werolti
After ni werkôta.
So denne der mahtigo khuninc
Daz mahal kipannit
Dara scal queman
Chunno kilîhhaz
Denne ni kitar parno nohhein
Den pan furisizzan,
Dî allero manno welîh
Ze demo mahale sculi,
Der scal er, vora demo ricche,
Az rahhu stantan,
Pî daz er, in werolti,
Kiwerkota hapêta.
Daz hôrt ih rahhon
Dia werolt-rehtwîson,
Daz sculi der Antichristo
Mit Eliase pâgan.
Der warch ist kiwâfanit;
Denne wirdit untar in wîk arhapan;
Khensun sind so kreftic,
Diri kosa ist so mihhil.
Elias strîtît
Pî den ewigon lîp,
Wili den rehtkernon
Daz rîhhi kistarkan;
Pidiu scal imo halfan
Der himiles kiwaltit.
Der Anticristo stêt
Pî dem Altfiante
Stêt pî demo Satanase,
Der inan farsenkan scal;
Pidiu scal er in der wîcsteti
Wunt pivallan,
Enti in demo sinde
Sigalos werdan.
Doh wânit des vila gotmanno,
Daz Elias in demo wîge arwartit (werdit).
Sâr so daz Eliases pluot
In erda kitruifit,
So inprinnant die perga,
Poum ni kistentit
Einic in erdu,
Aha artruknênt,
Muor varsuilhet sih,
Suilizot lougui der himil
Mâno vallit,
Prinnit mittilagart,
Stein ni kistentit einik in erdu.
Verit denne stuatago in lant,
Verit mit diu viuriu
Viriho wîsôn,
Dar ni mai denne mâk andremo
Helfan vora dema Muspille.
Denne daz preita wasal
Allaz varprinnit,
Enti viur enti luft
Iz allaz arfurpit,
War ist denne diu marha,
Dar man dar eo mit sînem magon
(Diu marha ist farprunnan
Diu sêla stêt pidungan),
Ni weiz mit win puoze;
Sâr verit si za wîze.
Pidui ist dem manne so guot,
Denne er ze demo mahale quimit,
Daz er rahhono welihha
Rehto arteile;
Denne ni darf er sorgên,
Denne er ze deru suonu quimit.
Denne varant engila;
Uper dio marho,
Wecchant diota,
Wîssant ze dinge;
Denne scal manno gelîh
Fona deru moltu arsten;
Lôssan sih ar dero lêuuo vazzon
Scal imo avar sîn lîp piqueman,
Daz er sîn reht allaz
Kirahhon muozzi,
Enti imo after sînen tâtin
Arteilet werde.
Denne der gisizzit,
Der dar suonnan scal,
Enti arteillan scal,
Tôten enti quekken,
Denne stêt darumpi
Engilo menigi,
Quotero gomono girust so mihhil.
Dara quimit ze deru rightungu so vilo dia dar arstent,
So dar manno nohhein
Wiht pimîdan ni mak;
Dar scal denne hant sprehhan,
Houpit sagên,
Allero lido wehh
Unsi id den luzigun vinger.
Ni weiz der wênago man
Wielihhan urteil er habêt;
Denne er mit den miaton
Marrit daz rehta,
Daz der tiuval darpî
Kitarnit stentit;
Der habêt in ruovu
Rahhono welihha,
Daz der man er enti sîd
Upiles kifrumita,
Daz er iz allaz kisagêt,
Denne or ze deru suonu quimit.
* * * * * *