VII Hildibrand and Hathubrand
TEXT OF GRIMM. TRANSLATION IBID.
Also in—Langue et Litérature des Anciens Francs, par G. Gley.
Ih gihorta that seggen, that sie urhetton ænon muotin
Hildibraht enti Hathubrant untar heriuntuem,
Sunu fatar ungo; iro saro rihtun,
Garutun se iro guthhamun, gurtun sih iro suert ana,
Helidos, ubar ringa, do sie to dero hiltu ritun.
Hiltibraht gimahalta, Heribrantes sunu, her was heroro man,
Ferahes frotoro, her fragen gistuont,
Fohem wortum: wer sin fater wari;
Fires in folche, eddo weliches cnuosles du sis?
Ibu du mi aenan sages, ik mideo are-wet,
Chind in chuninchriche, chud ist min al irmindeot.
Hadubraht gimahalti Hiltibrantes sunu: Dat sagetun mi
Usere liuti alte anti frote, dea erhina warun,
Dat Hilbrant haetti min fater, ïh heittu Hadubrant.
Forn her ostar gihueit, floh her Otachres nid
Hina miti Theotriche enti sinero degano filu;
Her furlach in lante luttila sitten
Prut in bure; barn unwahsan,
Arbeolosa heraet, ostar hina det,
Sid delriche darba gistuontum, fatereres mines,
Dat was so friuntlaos man, her was Otachre unmettirri,
Degano dechisto, unti Deotriche darba gistontum;
Her was eo folches at ente, imo was eo feheta ti leop.
Chud was her chonnem mannuma, ni wanin ih, in lib habbe.
Wittu Irmin-Got, quad Hiltibraht, obana ab havane,
Dat du neo danahalt mit sus sippan man dinc in gileitos!
Want her do ar arme wuntane bouga,
Cheiswringu gitan, so imo seder chuning gap
Huneo truhtin; dat ih dir it un bi huldi gibu!
Hadubraht gimalta, Hiltibrantes sunu:
Mit geru scal man geba infahan,
Ort widar orte, du bist dir, alter Hun, ummet,
Spaher, spenis mi mit dinem wortema,
Wilihuh di nu speru werpan,
Pist al so gialtet man, so du ewin inwit fortos;
Dat sagetun mi Sacolidante
Westar ubar Wentilsaeo, dat man wic furnam,
Tot ist Hiltibraht Heribrantes suno,
Hildibrant gimahalta Heribrantes suno: wela gisihu ih,
In dinem hrustim, dat du habes heine herron goten,
Dat du noh bi desemo riche reccheo ni wurti,
Welaga, nu waltant Got, quad Hiltibrant, we wurt skihit!
Ih wallota sumaro enti wintro sehstick urlante.
Dar man mih eo scerita in folc scestantero.
So man mir at burc einigeru banun ni gifasta;
Nu scal mih suasat chind suertu hauwan,
Bieton mit sinu billiu, eddo ih imo tí banin werden.
Doh maht du nu aodlicho, ibu dir din ellent aoc,
In sus heremo man hrusti girwinnan;
Rauba bi hrahanen ibu du dar enic reht habes.
Der si doh nu argosto, quad Hildibrant, ostarliuto,
Der dir nu wiges warne, nu dih es so wel lustit.
Gudea gimeirum niused emotti.
Wer dar sih hiutu dero prel-zilo hrumen muotti,
Erdo desero brunnono bedero waltan.
Do laettun se aerist asckim scritan
Scarpen scurim, dat in dem sciltim stout;
Do stoptun tosamene, starmbort chludun,
Hewun harmilicco huitte scilti
Unti im iro lintun luttilo wurtun—