M
Sentence pronounced by the judge of Savigny on Jan. 1457, condemning to death an infanticidal sow. Also the sentence of confiscation pronounced nearly a month later on the six pigs of the said sow for complicity in her crime.
Jours tenus au lieu de Savigny, près des foussés du Chastelet de dit Savigny, par noble homme Nicolas Quarroillon, ecuier, juge dudit lieu de Savigny, et ce le 10e jour du moys de janvier 1457, présens maistre Philebert Quarret, Nicolas Grant-Guillaume, Pierre Bome, Pierre Chailloux, Germain des Muliers, André Gaudriot, Jehan Bricard, Guillaume Gabrin, Philebert Hogier, et plusieurs autres tesmoins à ce appellés et requis, l’an et jour dessus dit.
Huguemin Martin, procureur de noble damoiselle Katherine de Barnault, dame dudit Savigny, demandeur à l’encontre de Jehan Bailly, alias Valot dudit Savigny, et promoteur des causes d’office dudit lieu de Savigny, demandeur à l’encontre de Jehan Bailly, alias Valot dudit Savigny deffendeur, à l’encontre duquel par la voix et organ de honorable homme et saige Mr. Benoit Milot d’Ostun, licencié en loys et bachelier en décret, conseïllier de monseigneur le duc de Bourgoingne, a été dit et proposé que le mardi avant Noel dernier passé, une truye, et six coichons ses suignens, que sont présentement prisonniers de ladite dame, comme ce qu’ils été prins en flagrant délit, ont commis et perpetré mesmement ladicte truye murtre et homicide en la personne de Jehan Martin en aige de cinq ans, fils de Jehan Martin dudit Savigny, pour la faulte et culpe dudit Jehan Bailly, alias Valot, requerant ledit procureur et promoteur desdites causes d’office de ladite justice de madite dame, que ledit défendeur répondit es chouses dessus dites, desquelles apparaissoit à souffisance, et lequel par nous a esté sommé et requis ce il vouloit avoher ladite truhie et ses suignens, sur le cas avant dit, et sur ledit cas luy a esté faicte sommacion par nous juge avant dit, pour la première, deuxiéme et tierce fois, que s’il vouloit rien dire pourquoi justice ne s’en deust faire l’on estoit tout prest de les oïr en tout ce qu’il vouldrait dire touchant la pugnycion et exécution de justice que se doit faire de ladite truhie; veu ledit cas, lequel deffendeur a dit et respondu qui’l ne vouloit rien dire pour le present et pour ce ait esté procédé en la manière qui s’ensuit; c’est assavoir que pour la partie dudit demandeur, avons esté requis instamment de dire droit en ceste cause, en la présence dudit défendeur présent et non contredisant, pourquoy nous juge, avant dit, savoir faisons à tous que nous avons procédé et donné nostre sentence deffinitive en la manière que s’ensuit; c’est assavoir que veu le cas lequel est tel comme a esté proposé pour la partie dudit demandeur, et duquel appert à souffisance tant par tesmoing que autrement dehuëment hue. Aussi conseil avec saiges et practiciens, et aussi considéré en ce cas l’usance et coustume du païs de Bourgoingne, aïant Dieu devant nos yeulx, nous disons et pronunçons par notre dite sentence, déclairons la tryue de Jehan Martin, de Savigny, estre confisquée à la justice de Madame de Savigny, pour estre mise à justice et au dernier supplice, et estre pendus par les pieds derriers à ung arbre esproné en la justice de Madame de Savigny, considéré que la justice de madite dame n’est mie présentement elevée, et icelle truye prendre mort audit arbre esproné, et ansi le disons et prononçons par notre dicte sentence et à droit et au regard des coichons de ladite truye pour ce qui n’appert aucunement que iceuls coichons ayent mangiés dudit Jehan Martin, combien que aient estés trovés ensanglantés, l’on remet la cause d’iceulx coichons aux tres jours, et avec ce l’on est content de les rendre et bailler audit Jehan Bailly, en baillant caucion de les rendre s’il est trové qu’il aient mangiers dudit Jehan Martin, en païant les poutures, et fait l’on savoir à tous, sous peine de l’amende et de 100 sols tournois qu’ils le dieut et déclairent dedans les autres jours, de laquelle nostre dicte sentence, après la prononciation d’icelle, ledit procureur de ladite dame de Savigny et promoteur des causes d’office par la voix dudit maistre Benoist Milot, advocat de ladite dame; et aussi ledit procureur a requis et demandé acte de nostre dicte court à lui estre faicte, laquelle luy avons ouctroyé, et avec ce instrument, je, Huguenin de Montgachot, clerc, notaire publicque de la court de monseigneur le duc de Bourguoigne, en la présence des tesmoings ci-dessus nommés, je lui ai ouctroyé, ce fait l’an et jour dessus dit et présens les dessus tesmoings. Ita est. Ainsi signe, Mongachot, avec paraphe, et de suite est écrit:
Item, en oultre, nous juge dessus nommé, savoir faisons que incontinent après nostre dicte sentence ainsi donnée par nous les an et jour, et en la présence des temoings que dessus, avons sommé et requis ledit Jehan Bailli, se il vouloit avoher lesdits coichons, et se il vouloit bailler caucion pour avoir recréance d’iceulx; lequel a dit et répondu qui ne les avohait aucunement, et qui ni demandait rien en iceulx coichons; et qui s’en rapportoit à ce que en ferions; pourquoy sont demeurez à la dicte justice et seignorie dudit Savigny, de laquelle chouse ledit Huguenin Martin, procureur et promoteur des causes d’offices, nous en a demandé acte de court, lequel lui nous avons ouctroyé et ouctroyons par ces présentes, et avec ce ledict procureur de ladicte dame, à moy notaire subescript, m’en demanda instrument, lequel je luy ait ouctroyé en la presénce desdits tesmoings cy-dessus nommés.
Item, en après, nous Nicolas Quaroillon, juge avant dit, savoir faisons à tous que incontinent après les chouses dessus dictes, avons faict delivrer réalement et de fait ladicte truye à maistre Etienne Poinceau, maistre de la haute justice, demeurant à Châlons-sur-Saône, pour icelle mettre à exécucion selon la forme et teneur de nostre dicte sentence, laquelle délivrance d’icelle trühie faicte par nous comme dit est, incontinent ledit maistre Estienne a mené sur une chairette ladicte truye à ung chaigne esproné, estant en la justice de ladite dame Savigny, et en icelluy chaigne esproné, icelluy maistre Estienne a pendu ladite truye par les piez derriers; en mectant à exécution deue nostre dicte sentence, selon la forme et teneur de laquelle délivrance et exécution d’icelle truye, ledit Huguenin Martin, procureur de ladicte dame de Savigny nous a demandé acte de nostre dicte court à lui estre faicte et donnée, laquelle luy avons ouctroyée, et avec ce à moi, notaire subscript, m’a demandé instrument ledit procureur à luy estre donnée, je luy ai ouctroyé en la présence des temoings cy-dessus nommez, ce fait les au et jour dessus ditz. Ainsi signé Mongachot, avec paraphe.
Nearly a month later, on “the Friday after the Feast of the Purification of Our Lady the Virgin” (which occurred on Feb. 2.), “the six little porklets or sucklings” were brought to trial. The following is the procès verbal.
Jours tenus au lieu de Savigny, sur la chaussée de l’Estang dudit Savigny, par noble homme Nicolas Quarroillon, escuier, juge dudit lieu de Savigny, pour noble damoiselle Katherine de Barnault, dame dudit Savigny, et ce le vendredy après la feste de la Purification Notre Dame Vierge, présens Guillaume Martin, Guiot de Layer, Jehan Martin, Pierre Tiroux et Jehan Bailly, tesmoings, etc.
Veue les sommacions et réquisitions faicte par nous juge de noble damoiselle Katherine de Barnault, dame de Savigny, à Jehan Bailly alias Valot de advohé on repudié les coichons de la truye nouvellement mise à exécution par justice à raison du murtre commis et perpetré par la dicte truye en la personne de Jehan Martin, lequel Jehan Bailli a esté remis de advoher lesdites coichons et de baillier caucion d’iceulx coichons rendre, s’il estoit trouvé qu’ils feussions culpables du délict avant dict commis par ladicte truye et de payer les poutures, comme appert par acte de nostre dicte court, et autres instrumens souffisans; pourquoi le tout veu en conseil avec saiges, déclairons et pronuncons par nostre sentence deffinitive, et à droit: iceulx coichons compéter et appartenir comme biens vaccans à ladite dame de Savigny et les luy adjugeons comme raison, l’usence et la coustume de païs le vueilt. De laquelle nostre dicte sentence, ledit procureur de ladite dame en a demandé acte, de nostre dicte court a luy estre donnée et ouctroyée. Avec ce en a demandé instrument à moy notaire subscript, lequel il luy a ouctroyé en la présence des dessus nommés. Signé Mongachot avec paraphe.
[Extract from the archives of Monjeu and Dependencies, belonging to M. Lepelletier de Saint-Fargeau. (Savigny-sur-Etang, boëte 25e, liasse 1, 2, & 3, etc.) Vide Mémoires, cit., pp. 441-5.]