Ambrosii Nicandri Toletani
In Singulos Libros Silii Catalepses.
Catalepsis Libri I.
Bellorum hic causæ, Pœnoque obsessa Saguntos
Est duce, legatos Latias quæ mittit ad oras.
Libri II.
Romanam prohibet navem contingere portus
Hannibal: huic clipeus datur, et ruit alta Saguntos.
Libri III.
Gades Pœnus adit, sortes petit æquore Bostar,
Dux Alpes superat, Taurinis qui sedet arvis.
Libri IV.
Ticini clades canitur, Trebiæque ruina,
Hic Apenninum transit cum milite Pœnus.
Libri V.
Insidias Tyrius ductor struit; hinc Trasymenus
Romanam indoluit stragem; tremit Itala tellus.
Libri VI.
Romam quisque petit: prima audit Punica bella
Serranus, referente Maro; et movet agmina Pœnus.
Libri VII.
Obvius Hannibali Fabius venit, isque cadentem
Collegam eripuit nato, cui reddit honores.
Libri VIII.
Conveniunt, Varrone duce, ad fera bella cohortes,
Italiæ et cladis signa infelicia surgunt.
Libri IX.
Collega invito Cannarum prælia Varro
Stultus init; portenta vetant; fugitque cruentus.
Libri X.
Cannis obcumbit Paulus, quem Pœnus honorat;
Spes Italas Fabius renovat, Varrone recepto.
Libri XI.
Ad Tyrios socii desciscunt; pectine Teuthras
Gesta virum canit; et Mago Carthagine certat.
Libri XII.
Parthenopen dux Pœnus adit Nolamque, resedit
Ad Capuam, trepidæ tenditque ad mœnia Romæ.
Libri XIII.
Pœnus ab urbe redit Capuam; tellure et Hibera
Scipiadæ obcumbunt: natus descendit Avernum.
Libri XIV.
Arte Syracosiam expugnat terraque marique
Urbem Marcellus, fœdat late omnia pestis.
Libri XV.
Scipio ad Hispanas juvenis tunc navigat oras,
Marcellusque cadit; cadit Hasdrubal ense Neronis.
Libri XVI.
Hispanos vicit dux Scipio; tecta Syphacis
Hospes adit, patrio celebratque in funere ludos.
Libri XVII.
Advehitur Romam Cybeles: hinc Scipio Pœnum
Dejicit Hasdrubalem, prostratoque hoste triumphat.