37 Erlinton
I
Erlinton had a fair daughter;
I wat he wear’d her in270 a great sin;
For he has built a bigly bower,
And a’ to put that lady in.
II
An’ he has warn’d her sisters six,
An’ sae has he her brethren se’en,
Outher to watch her a’ the night,
Or else to seek her morn an’ e’en.
III
She hadna been i’ that bigly bower,
Na not a night but barely ane,
Till there was Willie, her ain true love,
Chapp’d271 at the door, cryin’ ‘Peace within!’
IV
‘O whae is this at my bower door,
That chaps sae late, nor kens the gin272?’—
‘O it is Willie, your ain true love,
I pray you rise an’ let me in.’—
V
‘For a’ sae weel as I like ye, Willie,
For a’ sae weel as I ken the gin,
I wadna for ten thousand pounds, love,
Na, no this night wad I let ye in.
VI
‘But in the green-wood is a wake273,
And at the wake there is a wane274,
An’ there I’ll come as sune the morn, love,
Na, no a mile but barely ane.
VII
‘On my right hand I’ll have a glo’275, love,
And on my left hand I’ll have nane;
I’ll have wi’ me my sisters six, love,
And we will wauk the wood our lane276.’
VIII
Then she’s gane to her bed again,
She has layen till the cock crew thrice,
An’ then she said to her sisters a’,
‘Maidens, ’tis time for us to rise.’
IX
She pat on her back her silken gown,
An’ on her breast a siller pin,
An’ she’s ta’en her sisters by the hand,
An’ to the green-wood she is gane.
X
They hadna wauk’d in the bonny green-wood,
Na no an hour but barely ane,
Till up start Willie, her ain true love,
Wha frae her sisters has her ta’en.
XI
An’ he has kiss’d her sisters six,
An’ he has sent them hame again,
But he has keepit his ain true love,
Sayin’ ‘We’ll wauk the woods our lane.’
XII
They hadna wauk’d in the bonnie green-wood
Na no an hour but barely ane,
Till up start fifteen o’ the bravest outlaws
That ever bare either blood or bane.
XIII
Then up bespake the foremost knight,—
An’ O but he spake angrilỳ:
Says, ‘Yield to me thy ladye bright,
This night shall wauk the woods wi’ me.’—
XIV
‘I like her weel, my ladye bright,
And O my life but it lies me near!
But before I lose my ladye bright
I’ll rather lose my life sae dear.’
XV
But up an’ spake the second knight—
I wat he spake right boustruslie—
Says, ‘Baith your life an’ your ladye bright
This night shall wauk the woods wi’ me.’—
XVI
‘My ladye is my warldis meed277:
My life I winna yield to nane;
But if ye be men of your manheid,
Ye’ll only fight me ane by ane.—
XVII
‘O sit ye down, my dearest dear,
Sit down an’ hold my milk-white steed,
An’ see that ye dinna change your cheer
Until ye see my body bleed.’
XVIII
He set his back unto an aik278,
He set his feet against a stane,
He’s feightin a’ these fifteen outlaws,
An’ kill’d them a’ but barely ane.
XIX
An’ he has gane to his ladye dear,
I wat he kiss’d her cheek an’ chin—
‘Thou art mine ain, I have bought thee dear,
An’ now we will wauk the woods our lane.’
Footnotes
270 wear’d her in = led her into.
271 chapp’d = knocked.
272 gin = trick, or sleight, of the door-latch.
273 wake (obscure).
274 wane = dwelling, arbor.
275 glo’ = glove.
276 our lane = we alone.
277 warldis meed = world’s reward, most precious thing in the world: or perhaps corrupted from warldis make, mate.
278 aik = oak.