137 Kinmont Willie
I
O have ye na heard o’ the fause Sakelde?
O have ye na heard o’ the keen Lord Scroope?
How they hae ta’en bauld Kinmont Willie,
On Haribee to hang him up?
II
Had Willie had but twenty men,
But twenty men as stout as he,
Fause Sakelde had never the Kinmont ta’en,
Wi’ eight score in his companie.
III
They band his legs beneath the steed,
They tied his hands behind his back;
They guarded him, fivesome on each side,
And they brought him ower the Liddel-rack1167.
IV
They led him thro’ the Liddel-rack,
And also thro’ the Carlisle sands;
They brought him in to Carlisle castell,
To be at my Lord Scroope’s commands.
V
‘My hands are tied, but my tongue is free,
And whae will dare this deed avow?
Or answer by the Border law?
Or answer to the bauld Buccleuch?’—
VI
‘Now haud thy tongue, thou rank reiver!
There’s never a Scot shall set thee free:
Before ye cross my castle yate,
I trow ye shall take farewell o’ me.’
VII
‘Fear na ye that, my lord,’ quo’ Willie:
‘By the faith o’ my body, Lord Scroope,’ he said,
‘I never yet lodged in a hostelrie
But I paid my lawing1168 before I gaed.’
VIII
Now word is gane to the bauld Keeper,
In Branksome Ha’, where that he lay,
That Lord Scroope has ta’en the Kinmont Willie,
Between the hours of night and day.
IX
He has ta’en the table wi’ his hand,
He garr’d the red wine spring on hie—
‘Now Christ’s curse on my head,’ he said,
‘But avengèd of Lord Scroope I’ll be!
X
‘O is my basnet a widow’s curch1169?
Or my lance a wand of the willow-tree?
Or my arm a ladye’s lilye hand,
That an English lord should lightly1170 me!
XI
’And have they ta’en him, Kinmont Willie,
Against the truce of Border tide?
And forgotten that the bauld Buccleuch
Is Keeper here on the Scottish side?
XII
’And have they e’en ta’en him, Kinmont Willie,
Withouten either dread or fear?
And forgotten that the bauld Buccleuch
Can back a steed, or shake a spear?
XIII
‘O were there war between the lands,
As well I wot that there is nane,
I would slight Carlisle castell high,
Though it were builded of marble stane.
XIV
‘I would set that castell in a low1171,
And sloken it with English blood!
There’s never a man in Cumberland
Should ken where Carlisle castell stood.
XV
‘But since nae war’s between the lands,
And there is peace, and peace should be;
I’ll neither harm English lad or lass,
And yet the Kinmont freed shall be!’
XVI
He has call’d him forty Marchmen bauld,
I trow they were of his ain name,
Except Sir Gilbert Elliot, call’d
The Laird of Stobs, I mean the same.
XVII
He has call’d him forty Marchmen bauld,
Were kinsmen to the bauld Buccleuch;
With spur on heel, and splent1172 on spauld1173,
And gleuves of green, and feathers blue.
XVIII
There were five and five before them a’,
Wi’ hunting-horns and bugles bright:
And five and five came wi’ Buccleuch,
Like Warden’s men, array’d for fight.
XIX
And five and five, like a mason-gang,
That carried the ladders lang and hie;
And five and five, like broken men;
And so they reach’d the Woodhouselee.
XX
And as we cross’d the Bateable Land1174,
When to the English side we held,
The first o’ men that we met wi’,
Whae sould it be but fause Sakelde?
XXI
‘Where be ye gaun, ye hunters keen?’
Quo’ fause Sakelde; ‘come tell to me!’—
‘We go to hunt an English stag,
Has trespass’d on the Scots countrie.’
XXII
‘Where be ye gaun, ye marshal men?’
Quo’ fause Sakelde; ‘come tell me true!’—
‘We go to catch a rank reiver,
Has broken faith wi’ the bauld Buccleuch.’
XXIII
‘Where be ye gaun, ye mason lads,
Wi’ a’ your ladders, lang and hie?’—
‘We gang to herry a corbie’s nest,
That wons not far frae Woodhouselee.’—
XXIV
‘Where be ye gaun, ye broken men?’
Quo’ fause Sakelde; ‘come tell to me!’—
Now Dickie of Dryhope led that band,
And the never a word of lear1175 had he.
XXV
‘Why trespass ye on the English side?
Row-footed1176 outlaws, stand!’ quo’ he;
The never a word had Dickie to say,
Sae he thrust the lance through his fause bodie.
XXVI
Then on we held for Carlisle toun,
And at Staneshaw-bank the Eden we cross’d;
The water was great and meikle of spate,
But the never a horse nor man we lost.
XXVII
And when we reach’d the Staneshaw-bank,
The wind was rising loud and hie;
And there the Laird gar’d leave our steeds,
For fear that they should stamp and neigh.
XXVIII
And when we left the Staneshaw-bank,
The wind began fu’ loud to blaw;
But ’twas wind and weet, and fire and sleet,
When we came beneath the castle wa’.
XXIX
We crept on knees, and held our breath,
Till we placed the ladders against the wa’;
And sae ready was Buccleuch himsell
To mount the first before us a’.
XXX
He has ta’en the watchman by the throat,
He flung him down upon the lead—
‘Had there not been peace between our lands,
Upon the other side thou hadst gaed!—
XXXI
‘Now sound out, trumpets!’ quo’ Buccleuch;
‘Let’s waken Lord Scroope right merrilie!’
Then loud the Warden’s trumpet blew—
O wha dare meddle wi’ me?
XXXII
Then speedilie to wark we gaed,
And raised the slogan ane and a’,
And cut a hole through a sheet of lead,
And so we wan to the castle ha’.
XXXIII
They thought King James and a’ his men
Had won the house wi’ bow and spear;
It was but twenty Scots and ten,
That put a thousand in sic a stear1177!
XXXIV
Wi’ coulters, and wi’ forehammers1178,
We gar’d the bars bang merrilie,
Until we came to the inner prison,
Where Willie o’ Kinmont he did lie.
XXXV
And when we cam to the lower prison,
Where Willie o’ Kinmont he did lie—
‘O sleep ye, wake ye, Kinmont Willie,
Upon the morn that thou’s to die?’—
XXXVI
‘O I sleep saft, and I wake aft;
It’s lang since sleeping was fley’d1179 frae me!
Gie my service back to my wife and bairns,
And a’ gude fellows that spier1180 for me.’
XXXVII
The Red Rowan has hente him up,
The starkest man in Teviotdale—
‘Abide, abide now, Red Rowan,
Till of my Lord Scroope I take farewell.
XXXVIII
‘Farewell, farewell, my gude Lord Scroope!
My gude Lord Scroope, farewell!’ he cried;
‘I’ll pay you for my lodging mail1181,
When first we meet on the Border side.’—
XXXIX
Then shoulder high, with shout and cry,
We bore him down the ladder lang;
At every stride Red Rowan made,
I wot the Kinmont’s airns play’d clang!
XL
‘O mony a time,’ quo’ Kinmont Willie,
‘I have ridden horse baith wild and wood1182;
But a rougher beast than Red Rowan
I ween my legs have ne’er bestrode.
XLI
‘And mony a time,’ quo’ Kinmont Willie,
‘I’ve prick’d a horse out oure the furs1183;
But since the day I back’d a steed,
I never wore sic cumbrous spurs!’
XLII
We scarce had won the Staneshaw-bank
When a’ the Carlisle bells were rung,
And a thousand men on horse and foot
Cam wi’ the keen Lord Scroope along.
XLIII
Buccleuch has turn’d to Eden Water,
Even where it flow’d frae bank to brim,
And he has plunged in wi’ a’ his band,
And safely swam them through the stream.
XLIV
He turn’d him on the other side,
And at Lord Scroope his glove flung he;
‘If ye like na my visit in merry England,
In fair Scotland come visit me!’
XLV
All sore astonish’d stood Lord Scroope,
He stood as still as rock of stane;
He scarcely dared to trew1184 his eyes,
When through the water they had gane.
XLVI
‘He is either himsell a devil frae hell,
Or else his mother a witch maun be;
I wadna have ridden that wan water
For a’ the gowd in Christentie.’
Footnotes
1167 Liddel-rack = a ford on the Liddel.
1168 lawing = reckoning.
1169 curch = kerchief, coif.
1170 lightly = treat disrespectfully.
1171 low = flame.
1172 splent = split, or overlapping armour.
1173 spauld = shoulder, épaule.
1174 Bateable Land = debateable land; a stretch of frontier between the Solway Firth and Scots Dyke, claimed by both nations.
1175 lear = lore.
1176 row-footed = rough-footed.
1177 stear = stir, commotion.
1178 forehammers = sledge-hammers.
1179 fley’d = scared.
1180 spier = inquire.
1181 mail = rent.
1182 wood = mad.
1183 furs = furrows.
1184 trew = trust.