In Memoriam

Non hora myrto, non violis sinit
Nitere mensas. Trux Aquilo foras
Bacchatur, ac passim pruina
Tigna sagittifera coruscant;

Horretque saltus spinifer, algidæ
Sub falce lunæ, dum nemori imminet,
Quod stridet illiditque costis
Cornua, jam vacuis honorum,

Ferrata; nimbis prætereuntibus,
Ut incubent tandem implacido sali
Qui curvat oras. Tu Falernum
Prome, dapes strue, dic coronent

Crateras: ignis cor solidum, graves
Repone truncos. Jamque doloribus
Loquare securus fugatis
Quæ socio loquereris illo;

Hunc dedicamus lætitiæ diem
Lyræque musisque. Illius, illius
Da, quicquid audit: nec silebunt
Qui numeri placuere vivo.