VI Antoinette de Bourbon, Duchesse de Guise, to Mary, Queen of Scotland
Madame: L’on m’a tant assuré qu’on envoye les lettres sûrement par le moyen des Marchands d’Anvers, que je les ai mis à l’entrée pour en apprendre le chemin. Vostre sœur en doit estre la messagère. Je vous ai escrit la conclusion de son mariage et envoyé les articles et depuis ses noces par vostre brodeur. Je viens de la mener en ménage, en une belle et honneste maison et aultant bien meublée qu’il est possible, nommé Beaumoult. Son beau-père la receuillit tant honorablement et avec tant de gens de bien et grosse compaignye que l’on ne sait plus souhaiter; la Reyne de Hongrerie entre les aultres s’y trouvait et la Duchesse de Myllan, aussi Monsr et Madame la Princesse d’Orange, qui l’on tient grosse, toute fois la chose n’est pas fort sure, et pour ma part j’en doute. Il me semble v’re dite sœur est bien logée. L’on luy a fait de beau présens, et elle a de belles basques. Son Mary est jeune, mais il a bon vouloir d’estre du nombre des gens de bien. Il ne paraissait point qu’il fût Caresme, car les armes et les tambours ne cessaient point; il s’y est fait de beaux joustes là bas. A la fin il a fallu departir, qui n’a pas esté sans larmes. Je regagne ce lieu de Guyse, où je ne reste qu’une nuit, et demain à la Fère, où Monsr le Cardinal mon frère et mon père et ma sœur de St Pol seront mercredy, et vendredy recommencerai me mettre en chemin pour gagner Joinvylle le plus tost que je pourrais. Je pense trouver encore Monsr vre père, et nos enfans, savoir les petits et les prètres.... Ce xiiii Mars, à Guise....
Anthoinette de Bourbon.
À la Reyne d’Écosse,
[Balcarres MSS., ii. 5. Advocates’ Library, Edinburgh.]