English Songs and Ballads

Auld Lang Syne

Robert Burns

For auld lang syne, my dear,
 For auld lang syne,
We’ll tak a cup o’ kindness yet
 For auld lang syne!

Should auld acquaintance be forgot,
 And never brought to min’?
Should auld acquaintance be forgot,
 And auld lang syne.

We twa hae run about the braes,
 And pou’d the gowans fine,
But we’ve wander’d mony a weary fit
 Sin’ auld lang syne.

We twa hae paidl’d i’ the burn
 Frae morning sun till dine,
But seas between us braid hae roar’d
 Sin’ auld lang syne.

And here’s a hand, my trusty fiere,
 And gie’s a hand o’ thine,
And we’ll tak a right guid willie-waught
 For auld lang syne.

And surely ye’ll be your pint-stowp,
 And surely I’ll be mine,
And we’ll tak a cup o’ kindness yet
 For auld lang syne.

For auld lang syne, my dear,
 For auld lang syne,
We’ll tak a cup o’ kindness yet
 For auld lang syne!