Carols.
I.
S
SEIGNORS, ore entendez à nus,
De loinz sumes venuz à vous,
Pur quere noël;
Car l’em nus dit que en cest hostel,
Soleit tenir sa feste anuel,
Ahi, cest jur.
Deu doint à tuz icels joie d’amurs,
Qui à danz noël ferunt honors!
Seignors, jo vus dis por veir,
Ke danz noël ne velt aveir,
Si joie non;
E repleni sa maison,
De payn, de char, e de peison,
Por faire honor.
Deu doint à tuz ces joie d’amur!
Seignors, il est crié en l’ost,
Que cil qui despent bien, e tost,
E largement;
E fet les granz honors sovent,
Deu li duble quanque il despent,
Por faire honor.
Deu doint à....
Seignors, escriez les malveis,
Car vuz nel les troverez jameis
De bone part;
Botun, batun, ferun, groinard,
Car tot dis a le quer cunard,
Por faire honor.
Deu doint....
Noël beyt bien li vin Engleis,
E li Gascoin, e li Franceys,
E l’Angevin;
Noël fait beivere son veisin,
Si qu’il se dort, le chief enclin,
Sovent le jor.
Deu doint à tuz cels....
Seignors, jo vus di par noël,
E par li sires de cest hostel,
Car bevez ben;
E jo primes beverai le men,
E pois après chescon le soen,
Par mon conseil;
Si jo vus di trestoz; ‘Wesseyl!’
Dehaiz eit qui ne dirra, ‘Drincheyl!’