Glenlogie
There was monie a braw noble
Came to our Queen’s ha’;
But the bonnie Glenlogie
Was the flower of them a’.
And the young Ladye Jeanie,
Sae gude and sae fair,
She fancied Glenlogie
Aboon a’ that were there.
She speired at his footman,
That ran by his side,
His name, and his sirname,
And where he did bide.
“He bides at Glenlogie,
When he is at hame;
He’s of the gay Gordons,
And George is his name.”
She wrote to Glenlogie,
To tell him her mind:
“My love is laid on you,
Oh, will you prove kind?”
He turn’d about lightly,
As the Gordons do a’:
“I thank you, fair Ladye,
But I’m promis’d awa.”
She call’d on her maidens
Her jewels to take,
And to lay her in bed,
For her heart it did break.
“Glenlogie! Glenlogie!
“Glenlogie!” said she;
“If I getna Glenlogie,
I’m sure I will dee.”
“Oh, hold your tongue, daughter,
And weep na sae sair;
For you’ll get Drumfindlay,
His father’s young heir.”
“Oh, hold your tongue, father,
And let me alane;
If I getna Glenlogie,
I’ll never wed ane.”
Then her father’s old chaplain—
A man of great skill—
He wrote to Glenlogie,
The cause of this ill;
And her father, he sent off
This letter with speed,
By a trusty retainer,
Who rode his best steed.
The first line that he read,
A light laugh gave he;
The next line that he read,
The tear fill’d each e’e:
“Oh, what a man am I,
That a leal heart should break?
Or that sic a fair maid
Should die for my sake?
“Go, saddle my horse,
Go, saddle him soon,
Go, saddle the swiftest
E’er rode frae the toun.”
But ere it was saddled,
And brought to the door,
Glenlogie was on the road
Three miles or more.
When he came to her father’s,
Great grief there was there;
There was weepin’ and wailin’,
And sabbin’ full sair.
Oh, pale and wan was she
When Glenlogie gaed in;
But she grew red and rosy
When Glenlogie gaed ben.
Then out spake her father,
With tears in each e’e:
“You’re welcome, Glenlogie,
You’re welcome to me.”
And out spake her mother:
“You’re welcome,” said she;
“You’re welcome, Glenlogie,
Your Jeanie to see.”
“Oh, turn, Ladye Jeanie,
Turn round to this side,
And I’ll be the bridegroom,
And you’ll be the bride.”
Oh, it was a blythe wedding,
As ever was seen;
And bonnie Jeanie Melville
Was scarcely sixteen.
Old Ballad.