Loyalty
Hame, hame, hame! oh hame I fain wad be,
O hame, hame, hame, to my ain countrie!
When the flower is i’ the bud and the leaf is on the tree,
The lark shall sing me hame in my ain countrie;
Hame, hame, hame! oh hame I fain wad be,
O hame, hame, hame, to my ain countrie!
The green leaf o’ loyaltie’s begun for to fa’,
The bonnie white rose it is withering an’ a’;
But I’ll water ’t wi’ the blude of usurping tyrannie,
An’ green it will grow in my ain countrie.
Hame, hame, hame! oh hame I fain wad be,
O hame, hame, hame, to my ain countrie!
The great now are gane, wha attempted to save;
The new grass is springing on the tap o’ their grave:
But the sun thro’ the mirk blinks blythe in my e’e,
“I’ll shine on ye yet in yere ain countrie.”
Hame, hame, hame! oh hame I fain wad be,
Hame, hame, hame, to my ain countrie!
Allan Cunningham.