Hence, Hairt
Hence, hairt, with hir that most depairte,
And hald thé with thy souerane;
For I had lever want ane harte
Nor haif the hairt that dois me pane.
Thairfoir go, with thy lufe remane,
And lat me leif thus vnmolest;
And se that thou cum nocht agane,
Bot byd with hir thow luvis best.
Sen scho that I haif scheruit lang1308
Is to depairt so suddanly,
Address1309 thé now, for thow sall gang
And beir thy lady cumpany.
Fra scho be gon, hairtles am I;
For quhy? thow art with hir possest;
Thairfoir, my hairt, go hence in hy1310,
And byd with hir thow luvis best.
Thocht this belappit1311 body heir
Be bound to scheruitude and thrall,
My fathfull hairt is fre inteir,
And mynd to serf my lady at all1312.
Wald God that I wer perigall1313,
Vnder that redolent ross to rest;
Yit at the leist, my hairt, thow sall
Abyd with hir thow lufis best.
Sen in your garth1314 the lilly quhyte
May nocht remane amang the laif1315,
Adew the flour of haill1316 delyte,
Adew the succour that ma me saif!
Adew the fragrant balmé suaif1317,
And lamp of ladeis lustiest!
My faythfull hairt scho sall it haif,
To byd with hir it luvis best.
Deploir, ye ladeis cleir of hew,
Hir abscence, sen scho most depairte;
And specialy ye luvaris trew
That woundit bene with luvis darte.
For sum of yow sall want ane parte
Als weill as I; thairfoir at last
Do go with myn, with mynd inwart,
And byd with hir thow luvis best.